Waa la marin habaabiyay quruxdi Maxaakimta Muqdisho iyo guulo kale oo ay ka soo hooyaan nabad ku soo dabaalida magaalada Muqdisho, iyadana waa la marin habaabiyay guulihi beryahanba lagu tirinayay in ay midowga Maxakimta Muqdisho soo hooyeen kolki shalay oo taariikhda ahayd 24/06/2006 lagaga dhawaaqay magaalada Muqdisho, Hoteelka Ramadaan shir aanan hore loo sheegin iyo cidda ka soo qeybgashay yey mathalaan ,ma dadka Soomaaliyeed oo dhan, misa xisbi gaar ah oo iyaga is bar yaqaan sidi Xisbiga Al Itixaad ,dana gaar ahna mathalo.

   Ku dhawaaqida shalay ee madaxa Golaha Shuurada Maxaakimta Soomaaliye Col Shikh Xasan Daahir Aweys iyo xubno tiradooda lagu sheegay 88 Ay ku dhawaaqeen shaqsiyaad  is baryaqaan waxay ahayd mid loo ekeysiiyay ku dhawaaqid Dowlad aanan si toos ah loo Iclaamin. Haddaba annaga  oo ka duulayno mugdi gelinta siyaasada Soomaaliyeed mar kale iyo mugdi gelinta soo dhowaashada  nabad Soomaalida ku degayso oo dalkooda lagu soo dabaalo,waxaan ka digeyna dhiirigelinta iyo taageerida waxaynan ummadda Soomaliyeed u dhamayn si aan uga korno dib ugu noqoshada dagaallo qabiil oo aanan ujeeda fog lahayn ,aadna ay ugu farxayaan cadawga Soomaali weyn oo gaarto kala danbayn iyo dowlad dhexe oo arrimaahada ka taliso.

   Ku dhawaaqida shalay ee Madaxa Golaha Shuurada ee Maxaakimta Soomaaliye oo loo ekeysiiyay Dowlad, waxay jidka u xaareysa dagaalo wejiya badan leh oo dalkeena ka dhaco ,waxaana dagaaldaas ka mid ah mid horaba u dhax maray,lana filayo in uu mar kale dhax maro madaxa DFKM ku sheega iyo gudoomiya ku Sheega Golaha Shuurada ee Maxakimta Soomaaliya Waxaa kale  oo ay iyadana jidka u xaareysaa soo noolaynti dagaalki qabiil ee Mudisho la habsaamay lix iyo toban sano oo aan gadaal u fiirinay.

  Waxaan faaladan ku soo qaadanaynaa ka warbixinta labada shaqsi ee kala horboodayso labada koox ee si cad maanta isugu haayo, waa aniga iyo waa aniga ninka horkacayo Diktatooriyad mar kale lagu soo rogo ummadda Soomaaliyeed.

  Waa laba dowlad  oo aanan midnana lagu soo dhisin kalsoonida ama wadajirka ummadda Soomaaliyeed intooda Badan,waa laba dowlad ee mid uu soo dhisay cadowga Soomaaliyeed (Xabashada,Kenya iwm), midna ay soo dhistay beel gaar ah oo ka tirsan beelaha Soomaalida xoogna ku haysato koofurta Soomaaliya, waa laba hogaamiye oo fikirkooda aad u kala fogyahay, waa laba nin oo waqti badan ku bixiyay gaarista, ayagga oo gacanta ku dhiga halbowlaha laga xukumo Dalka Soomaaliya waa Muqdishee, waa laba hogaamiye oo mid walba hoosaasi ka dhigtay, ama iska soo hormariyay ,ama ku guubaabiyo adiga garabgayga ayaad tahay nin ka soo jeedo beesha Hurdaweyne ee ayagga loo yaqaan in ay yihiin dadka ugu tira badan deegaanka Muqdisho ,loona tirayo nabad la'aanta Soomaaliya ku habsatay mudda dheer, in ay asbaab u tahay daciifnimada hogaamiyayaashooda siyaasadeed, ama in aynan maanta lahayn hogaamiye karti u leh mideynta maamulka Muqdisho iyo mideynta beeshaas Hurdaweyne iyo beesha kale oo ay walaalaha yihiin, kana uu soo jeedo Col Xasan Daahir Aweys.

  Waa laba Korneel, oo horay dagaal u dhaxmaray ,waa laba Korneel oo ciil badan isu qaba, waxaa dagaalki hore lagu jebiyay Col Xasan Daahir Aweys iyada oo jabkaas kaga yimid deegaanka dagaalka ka dhacay oo ahaa Boosaaso ,qabiil ahaana ay ku badan yihiin Beesha uu ka soo jeedo Col Cabdullahi Yusuf,isla markaasna gacan ka helaayay Xabshida oo aad uga soo Horjeedo fikirka Col Xasan doonayo in uu ku gaaro xukunka Soomaaliya oo isaga ah, Soomaaliya ha lagu dhaqo shareecada Islaamka, taana waxaa la qabo ummadda Soomaaliyeed intooda badan,wallow lagu kala duwan yahay qaabka loo marayo dhisida dowlad dalkeena ku soo dabaasho ku dhaqanka dastuur ku xiriiro shareecada Islaamka,. waxaase is weydiin mudan dagaalka xigo oo ay gacna badan faraha kula jiraan, gacmahaas ha ahaadeen Dowladaha Deriska la ah Soomaaliye,dhul Soomaaliyeedna xoog gumaysi ku haysto, ama dowladaha waaweyn ee isticmaarigaa oo dalka Soomaaliya ka leh dana gaar ah, amasa ha ahaadeen hogaamiyayaasha Soomaaliya oo aanan iyaga badankooda lahayn ujeeda wadaniyeed oo Soomaali-weyn maanta ka badbaadin karto mugdiga cusub oo ay lugaha la gashay.

   Kumaa ku guulaysanayo labada Korneel dagaalka ay isugu biratumanayaan, ma Col Shikh Xasan Daahir oo markaan joogo deegaanka tolkiisa wallow aynan fara badnayn qabiil ahaan kalsoonida uu beesha Hawiye ka qabo, Sida uunan Col Cabdullahi Yusuf kalsooni badan uga qabin beeshiisa hoose ee Harti ama isku wada duub beesha Darrood oo dhan.

  Tan yaa guulaysanayo waxaan u daynaynaa Zamanka iyo qadarka uu Ilaahey bado ummadda Soomaaliyeed,Ilaahey ha na waafajiyo towfiiqda iyo wixi dan u ah ummaddaan adduun iyo Aakhiro, amen.

  Col Cabdullahi Yusuf wuxuu dalka Soomaaliya ku leeyahay taariikh madow, oo ay ugu horeyso mid uu isagaba afkiisa ka qirto, mar walbana uu ku soo celceliyo ,in uu isaga yahay ninki ugu horeyay ee isku dayo in uu xukunka Soomaaliye ku maroorsado xoog dabada ku haayo qabiil.

  Waxaa kale oo xumaanihiisa ka mid ah in uunan ahayn muwaadin toosan, waayo rabitaankiisa ku aadan in uu gaaro madaxweyne Soomaaliyeed wuxuu u soo maray Dowlada Xabashida oo aanan iyada marnaba ogalayn Soomaliya oo ay ka amba-qaado dowlad dhexe oo xoog leh oo ka arrimiso arrimaha dadka iyo dalka Soomaaliyeed.

  Col Cadullahi waxaa kale oo lagu soo eedeeyay falal dil ah oo uu kula kacay shaqsiyaad waaweyn oo ixtiraam ku dhax leh Bulshada Soomaaliyeed sida Suldaanki beeshiisa iyo kaaba qabiilki u danbeeyay oo ay maleeshiyadiisa ku toogteen bartanka magaalada Baydhabo maalin cad.

  Col Xasan Daahir Aweys isaga ma jirto xumaan toos ah oo loo yaqaan marka laga reebo in uunan weligiis soo hadal qaadin, eedeyn iyo cambaareyn  ku aadan dhibaatooyinka ay geystaan maleeshiyaad ka soo jeedo beeshiisa  xoogna ku haysto koofurta Soomaaliyeed, dadka Soomaaliyeedna ula dhaqmo qaab aad uga xun dhaqanki gumaysiga caddaa ee soo maray dalka Soomaaliye.  

  Col Xasan Daahir waa nin daboolan ,bareerihiisa siyaasadeedna aynan cadayn, Col Xasan ma jjirto taariikh laga haayo meel uu ku gaaray darajada Shiikh Islaami ah iyo meel uu kula takhasusay diinta Islaamka iyo meel uu dacwa diineed kaga fidiyay dalka Soomaaliya, marka laga reebo in uu mar walbo hadalkiisa ku adkeeyo siyaasad ahaan, waa in dalkeena lagu dhaqaa shareecada islaamka ,taasoo ay dad badan u arkaan in uu doonayo in uu xukunka Soomaaliya ku gaaro ku gambashada diinta Islaamka gadaasheeda, maadaama ay ummadda Soomaaliyeed tahay ummad aad ugu dhegan diinteeda.

  Col Xasan Daaahir waxaa lagu xantaa in uu yahay xubin firfircoon oo ka tirsan Xisbiga Al Itixaad .

  Xubin ka ahaashada xisbi diini ah oo fakir gaar ah leh, khilaafna kala dhxaeeyo xisbiyada diiniga ah ee isaga kala mid ah lahaashaha dana gaar ah waxay ka hor-imaanaysaa ku tiirsanaashada dhabta ah ee Xisbu-Allah(Xisbiga Ilaahey), waxay diinteena na bartay in ummadda Islaamka ay aakhiro zamaanka u qaybsamaeyso 71 Firqo ama Xisbi ,waxaana najaxaaya oo kaliya Xisbu-allah(Xisbiga Ilaahey).

  Labada Korneel mid walba wuxuu wataa siyaasad cad oo uu doonayo in uu awoodiisa kaga hirgeliyo dalka Soomaaliya.

  Cabdullahi Yusuf wuxuu wataa Xabashi iyo maleeshiya uu kala yimid Puntland , uuna ku sheegay in ay yihiin ciidanki Dowladda ,sidaas ayuuna ku doonayaa in uu ku qabsado waddanka Soomaliya.

 Col Shikh Xasan Daahir wuxuu wataa Dalkeena waxaan ka hergelinayaa.Diinta Islaamka ,waxaana ciidan u ah maleeshiyada Beeshiisa iyo inti la-qabto oo rumaysato in Col Xasan ay ka dhab tahay diintaan u adeegayaa, idinkuguna adeegayaa.

Labada Korneel waxaa horyaal tiro fara badan oo jidgooyo ah, aadna u kala duwan.

Col Cabdullahi Yusuf waxaa horyaal xamar oo uu nabad ku galo ama xoog ku galo Hawiyana raali ka yahay.,waana il iyo dheg oo isgaaro sida aynan suurtagal u ahayn..

Col Xasan Daahir Aweys waxaa horyaalo Hawiye oo caada ka dhigtay ka hor imaanshaha wiilashiisa ha samaado wiilkooda ama  ha xumaadee.

  Soomali oo dowlad hesho waxay lugaha la gashay mugdi madow oo gudcar ah  waxaana mugdigaas looga bixi karaa helitaanka hogaamiya ka madax banaan dana gaar ah, qalbigana ku wato fikir nadiif ah iyo in uu u adeego ummaddiisa si daacadnimo ah oo ilaahey Raali ka yahay.

25/06/2006

Abdallah Moallim Mahamud(Cabdullahi Siyaasi) -- Moallem10@hotmail.com