Soomaaliyeey Aan Dhan Uga Soo Wada Jeesano Xabashi Iyo Wixi La Socdaba

By: Abdallah Moallim Mahamud  -- Moallem10@hotmail.com

Dadka Soomaaliyeed meel walba oo ay joogaan waxay aad u soo dhoweeyeen nabadda ka islaaxday (curatay) magaalada Muqdisho iyo deegaanada ku xeeran oo lix iyo toban sano oo la soo dhaafay ahayd xarunta qabqablayaal dagaal oo ay nolaoshooda ku tiirsanayd, miirashada dhiiga maatidooda, u adeegida danaha gurracan ee cadawga ummadda Soomaaliyeed, ka shaqaynta fogeynta kalsooni dhaxmarto ummadda Soomaaliyeed dhaxdooda iwm. 

Dhinaca kalana, Soo dhoweynta nabadaas keddib, waxay ummadda Soomaaliyeed si aad ah, ugu hanqaltaagayaan cadaalad lagu dhaqmo oo xidido adag u yeesho nabadda la helay, isla-markaasna nabadda gaarsiiso dalka Soomaaliyeed intiisa kale, waxayna si aad ah ilaahey uga rajeynayaan, in dalkooda iyo dadkooda xor u ahaadaan ku dhaqanka shareecada islaamka sida ay tahay oo uu na baray Rasuulki Ilaahey Moxamed ibnu cabdullahi NKHA.

   Guushaas ummadda u soo hoyatay, waxay dadka Soomaaliyeed intiisa badan ka dharagsanyihiin in ay tahay, mid aanan ku imaan qorshaha kooxda Isutagga Maxaakimta Soomaliyeed oo iyaga hadda hormuud u ah, adkaynta nabadaas sida ummadda ka sugayso, balse waxaa nabadda Muqdisho lagu helay towfiiq xumo uu Ilaahey ku riday qabqablayaashi dagaal ee Muqdisho, oo iyaga si aanan ganbad lahayn u iclaamiyeen (kor-u-sheegeen) la dagaalanka Ilaahey, Rasuulkiisa Moxamed(NKHA), Diinta Islaamka iyo Culamadi u taagnayd kor u qaadida tayada aqooneed ee ummadda Soomaaliyeed xagga diintooda..

  Aan hordhac keddib u soo noqono hadafka Maqaalkan oo isaga ah, sideen diinteena ugu dheganaanaa ,nabadda Ilaahey na siiyana aan Ilaahey ugu shukrinaa ,cadawgana isaga dhicinaa, munaafiqiintana isaga qabanaa

   Inta aanan u guda gelin, tilmaanta aan guul kaga soo hoyn karno (Soomaali ahaan) ififaalaha dagaal ee beryahan ka aloosan geeska Africa oo isaga weji badan leh, waxaan rajeynayaa in aan horta tilmaan ka bixiyo Milis Sanaawi, madaxweynaha dowladda Itoobiya dagaalka uu iclaamiyay, yuu ku jeedaa ,maxaysa ujeedadiisa tahay, maxaasa isaga shaqsi ahaan ku qasbay in uu dagaal ku qaado dalki ku kaalmeeyay gaarista in uu gacanta ku dhigo saldanada itoobiya.

  Dagaalka uu iclaamiyay Milis-Sanaawi in uu ku qaadayo isutagga Maxaakimta Soomaaliyeed wuxuu runtiisa ku jeedaa dalka iyo dadka Soomaaliyeed meelwalba oo ay joogaan ,kana ay mid tahay DFKM uu isaga ku andacoonayo in uu ka difaacayo Maxaakimta. Waxaana xaqiiqada hadalkan sal u ah

 Ka hor inta aynan Muqdisho ku dhicin gacanta maamulka Maxaakimta, marnaba Milis-Sanaawi lagama maqlin in uu dagaal ku qaadayo qabqablayaashi fadhiyay magaalada Muqdisho, kana soo horjeeday DFKM in la gaarsiiyo dalka intiisa kale, waayo wuxuu ka dheragsanaa, xaqiiqadana ay tahay in hogaamiyayaashaas, dhab ahaan uga shaqaynayeen si toos ah iyo si dadbanba, danahiisa ahaa in aynan Soomalida mar kale lugahooda ku istaagin, inta dowlada Itoobiya ka gaareyso gacan ku dhigida halbowlaha dhexe ee maamulka Somaaliya guud ahaan, iyaga oo ay howshaas u mathalayaan hogaan Soomaaliyeed ee awaamirta ka qaato magaalada Addis-Ababa.

     Melis-Sanaawi in uu Maxaakimta dagaal ku qaado waqtigan, Ujeedadiisa ma'ahan neceyb gaar ah ee isaga u haayo Maxaakimta, wallow ay hubaal tahay in uunan jeclayn diinta Islaamka iyo dal deris u ah dalkiisa oo lagu xukumayo diinta Islaamka, haddana xaqiiqada iyo runtaba waxay tahay arbushaad uu doonayo in uu ku sameeyo, in aynan Soomalida fursad u helin, koox soo celiso dalkooda iyo dadkooda oo xor u ah in ay is-maamulaan, kooxdaas ha ahaato mid la wada raacsan yahay ama la diidan yahayba.

     Milis Sanaawi maxaa ku qasbay in uu ku abaalfuro ummadda Soomaaliyeed oo iyada sabab u ah in ay gaarsiiso kursiga uu maanta ku fadhiyo, jawaabta su'aashan ,ma'ahan mid meel fog laga doonayo, waayo nacaybka uu isaga u qabo Soomaalida waa mid soo jireen ah oo ay la qabaan siyaasiyiin badan oo Itoobiyaan ah , oo hubo ummadda Soomaaliyeed in aynan marnaba si sahala uga hareyn dhulka ka maqan. Sidaa darteed wuxuu ogyahay in uunan ku dhiiran Karin ka hor-imaadka dowlad Soomaaliyeed oo dadkeeda ku dhisan, kol haddii uunan gacan ku yeelanayn maamul ka arrrimiyo dalka soomaaliya ,dhicidi Maxamed Siyaad keddib(allah ha u naxariistee), haddii uunan taa yeelinna wuxuu qabaa, kuna jiifaa in xukuumadiisa dhicideeda laga soo abaabulayo magaalada Muqdisho..

     Markaan u soo noqdo yoolka maqalkan, waa waajib na saaran in aan isku baraarujino difaacida dalkeena,  annaga oo arrinta ka fiirineyno xaalada taagan ,meelna iska dhigayno si ku meel gaar ah khilaafaadka ku salaysan qaabka uu ahaanayo xukunka waddankeena, yaa xukumayo iyo hadalada ah, maxaakimta waxaa ku jiro dad xun, mana gayaan xukunka Soomaaliya iyo hogaankooda waa mid quman ee ha la taageeraa si looga mira dhaliyo kacdoonki Muqdisho . dhinaca kale marnaba ma'ahan in aan garab istaagno ruux walba oo ka soo dhinac dagaalo askarta Milis-Sanaawi, cidday doonto ha ahaatee ,cudurdaarkay doontana ha la timaadee.

    Sideen diinteena ugu dheganaana waa mid sahlan, waana ku tilaabsashada qaadashada Kitaabka Ilaahey iyo waddadi uu noo jeexay Rasuulkeena Moxamed NKHA.

      Sideen ugu shukrinaa Ilaheey nabada uu na siiyay, waa annaga oo hal gacan ahaano, khilaafaadkana meel iska dhigno ,daacadna u ahaano hogaamiyihi nagu horkaco in aan wax ku qaybsano shareecada Ilaahey noo soo dejiyay.

    Cadowgeenana waa ka adkaanaynaa haddii aan yeelno labada hore ,waana hubaal taa, waayo Ilaahey wuxuu noo sheegay ruuxi guul siiyo Ilaaheey, in uu isgana guul siinayo.

     Munaafiqiinta sideen isaga qabanaa waxay ku jeedaa madaxda Maxaakiimta oo iyaga hormood ka ah dagaalka diinteena iyo dalkeena  looga difaacayo dowladda Tikree iyo daba dhilifyadeeda iyo cid walbo oo gadaashooda ku timaado waqtigan xaadirkaa.

    Madaxda Maxaakimta waxaan ka codsanaynaa in ay yeeshaan hogaan cad ee dhabarka u dhigan karo wixi khalad ah ee ka dhaco maamulkooda, waxaan ka codsnaynaa in ay xadidaan awoodiisa inta ay ku ektahay hogaamiya walbo ee madax ka ah, ama xubin ka ah isutagga maxaakimta Soomaaliyeed, si uu u yaraado wararka la iska dhinac dhaho ee is-khilaafsan. Waa in ay joojiyaan ka hadlida siyaasado khatar gelin karo xaalada cakiran ee Soomaaliya ka taagan maanta. Waa in aynan ku dhawaaqin go'aano aynan daraaso ku samayn faa'iidada iyo khasaarada ay ummadda leeyihiin waqtigan xaadirkaa.

    Dhamaan ummadda soomaaliyeed ee dalkooda iyo dadkooda jecel ,waxaan fariintan kaga codsanayaa in ay u istaagaan difaacida diintooda, dadkooda iyo dalkooda ,iyo in ay meel uga soo wada jeestaan cadawgooda oo beryahan diyaar-garow adag ugu jiro sidi uu nooga qaadi lahaa neecawda Xoriyo ee Muqdisho ka soo carfayso maalmahan.

  Xabashi marnaba maankeeda kuma jirin in ay beryahan Soomaali ka soo bixi karaan rag (Sida Shikh Shariif Shikh Axmed) umaadooda ku hogaamin karo wadadi ay ku gaari lahaayeen xoriyad dhamaystirin, oo ay sideedaba maanta gaaban tahay dowladaha caalamka saddaxaad dowlad haysato.

    Jihaadka waa fara badan yahay ee yaanan loo kala harin ka qayb qaadashadiisa ,dhinaca kalana yaanan looga harin, hebel oo xun ka dhinac dagaalimayno, ogow nin xun kuma sii dhax  jiri karo dad san ee meel ka soo wada jeedo.

    Guusha waa innagga ,jabkana waa xabashi,waa munaafaq iyo inti la socotaba ilaahey idinkiis. 25/11/2006

Abadllah Moallim Mahamud   Moallem10@hotmail.com