Shirkaan oo ka dhacay Hotelka Gran Regency ee Nairobi ayaa waxaa lagu lafa guray qaabkii ay Beesha Mudulood wax ugu qeeybiyeen koox ay ugu yeereen calooshood u shaqeeysta yaal, kuwaasoo sida ay sheegeen anan metelin Beelaha ku abtirsada Mudulood.

War murtiyeed loo qeeybiyey Saxaafadda ayaa qaabkii Mudulood wax loogu qeeybiyey lagu sheegay mid cadaaladda ka fog, Dr. Xusseen Xaaji Bood oo ugu horeeyntii kulankaasi ka hadlay ayaa sheegay in lagu xad gudbay Qodobka 30-naad ee qexaya qaabka ay Beeluhu Xildhibaanada u qeeybsanayaan wuxuuna ku tilmaamay Liiskii ay IGAD,u gudbiyeen Koox uu ku tilmaamay in ay dan qaas ah lahaayeen mid Cadaaladda ka fog isla markaana anan lagu saleeynin Sharciga.

Mar uu ka jawaabayey su`aal ahayd sababta ay waqtigaan cabashadooda ugu soo beegeen oo ay Saxaafaddu weeydiisay ayuu sheegay in danta laga lahaa kulankaan balaaran ay tahay in sharciga iyo qawaaniinta la raaco ee anan cidna laga gaabsan isaga oo sheegay inuu sharcigu cid waliba ka horeeyo, Shirka Hanan baa u degsanaa oo uu ku socday haddii sharcigii u degsanaa lagu xad gudbana ma aha in aan ka aamusno mana aha in naloo fahmo in anu nahay Kursi doon ayuu Yiri Dr. Bood,

Mar kale oo uu ka jawaabayey Su`aal ahayd Maadaama ay IGAD, sheegtay in ay Baarlamaanka Soomaalida dhaarin doonaan 19ka bishaan, haddii cabashooyinkooda wax laga qaban waayo waxa la gudboon ee ay ku dhaqaaqi karaan, in aan wax sameeyneeno waay cadahay laakiin waqtigeeda ayaan sugeeynaa, wuxuuna yiri IGAD, ma aha in ay isku kaaya dirto. Hal Booli ahi Nirig Xalaal ah ma dhasho ayuu yiri oo uu ula jeeday in haddii IGAD, ay dhaariso xubnaha baarlamaanka Liiskii Muduloodna anan dib loosoo celin taasi micneheedu ay tahay wax is diba marsiis sida uu sheegay.

Wax waliba sharci ayeey lahaayeen IGAD na ma aha in ay wax aan sharciga waafaqsaneeyn Ansixiso.

Mar wax laga weeydiiyey Waxyaabaha keenay in ay Cawdaan maadaama uu Imaamka Beeshu Liiskaasi ansixiyey , ayuu sheegay inuu Imaamku qaldami karo uuna yahay Bani aadam laakiin waxaan leenahay waxaad saxiixday dib ugu laabo, Imaamka ka horna waa in ay Beeluhu si Cadaaladi ku jirto ay wax usoo xushaan Imaamkuna ma aha buu yiri inuu meel la galowaxa uu ugu yeeray sedax Dagaal ooge waana inuu la tashtaa Boqorada kale,

Waa in sharciga loo hogaansamaa haddii uu Imaamku sharciga ka il duufayna waxaan leenahay Raali ahaaw waxa aan u doodeeynaahina ma aha dan Shaqsi ee waa Cadaaladda iyo danta Mudulood ayuu yiri mana aha in heshiisyada la garab maro Dr. Bood

Musharaxa Max`ed Max`ud ayaa ka hadlay in aysan meesha isagu imaan in ay Kursi u doodaan laakiin ay u yimaadeen sidii Dalkii Dowladd wax tarta loogu dhisi lahaa wuxuuna yiri Dowladd abaabulkeedii hore dhinac martay in ay xeerarka iyo qaaynuunka dhinac marto ma aha Dowladdaan labada sano u fadhinay, sida an Dowladd Caadil ah ku heli karnaahina waa in an u hogaansano dhamaan waxa uu qorayo Dastuurku oo aan isku dayno in anan garab marin.

Ruqiya Cali Cabdi oo iyana halkaasi ka hadashay ayaa si kulul u cabaareeysay qaabkii Mudulood wax loogu qeeybiyey iyadoo si kulul u weerartay dhamaan Beelaha Soomaalida oo ay ku eedeeysay in aysan Gabdhaha Soomaaliyeed aysan doorkoodii siin iyada oo sheegtay in aysan taasi Beeluhu ku kala rooneen, Haweenka dhibaata kasta dhabarka u dhigtay 14kii sano ee dagaalka sokeeye Soomaaliya ka socday isla mar ahaantaana dhibaata kasta ay iyaga hoos imaaneeysay ma aha in ay Beelaha Soomaaliyeed Xaqiraan, Soomaalidu waligeenba waay na liidi jireen wax nooma ogoleen laakiin Beesha Caalamka ayaa noo garatay in aan qeeyb ka qaadano shirkaan wax kale kama rabnee intii Aduunku noo qoodneeyey ma yeeleeyno in ay naga fara marooqsadaan ayeey si kulul u tiri Ruqiya oo si gaar ah Beesha Mudulood ugu eedeeysay 15kii Xildhibaan ee ay ka heleen Hawiye in aysan xitaa hal Xubin ka siin Gabdhaha taasina waa wax aysan Beelaha kale la qabin ayeey sii raacisay.

Canab Axmed Ciise ayaa iyana sheegtay in ay la yaabantahay waxa ay Raggu u iloowsanyihiin Haweenka mise Haweenka waay ka maarmaan, Haweenku waa kuwii u dhaxay,dhaqayey, aasayey ee ma aha in Haweenka la ilaawo mana ku raaci doono in ay Beelaha Soomaaliyeed Haweenka gacan bidxeeyaan ayeey tiri,

Waxaay sheegtay inuusan Imaamku liis anan loo dhameen ansixin Karin, Imaamku ma Ragga kaliya ayuu Imaamu yahay ayey Tiri Canab Axmed.

Dr. Cali Cabdulle oo isna Madashaasi ka hadlay ayaa sheegay in Xaqqa ay wanaagsantahay in lagu dhaqmo Baadilkana laga tago isagoo waxa Soomaalida u diiday in ay sharciga ku dhaqmaan ku sheegay Jaahilnimo haddii ay aqoon lahaan lahaayeen waxa ay ku heshiiyaan ayeey ku dhaqmi lahaayeen Balan ka baxyaba ma dhacdeen ayuu hadalkiisa sii raaciyey, waxa kale oo uu yiri in la isku kaaya diro meesha uma imaan ee in nala heshiisiiyo ayaan u nimid.

Max`ed kulmiye oo isna halkaasi ka hadlay ayaa ku tilmaamay dhacdadaan Mudulood ku dhacday nasiib daro.wuxuuna wax laga naxo ku tilmaamay in ay IGAD, u xalaaleeyso in ay is dilaan.

Dhamaan Siyaasiintii iyo wax garadkii Maanta shirkaasi jaraa`id ka hadlay ayaa hoosta ka xariiqay hal ku dhig ahaa Shirku ma shir dib u heshisiineedbaa mise waa shir dib isugu dir.

Dhamaan dadkii maanta halkaasi ka hadlay ayaa sheegay inaaysan dhibaatadu ahayn oo kaliya Xagga Soomaalida ee IGAD, laf ahaanteedu aysan eeda ka marneen.

Mar dhan kasta laga eego hadaba is kadaba jiitanka iyo buuqa ka dhex taaqan Beelaha ayeey Beesha Mudulood waxa ay ahayd Beesha ugu buuqa yar marka la eego Xaaladda Beelaha kale .

Maryan Max`ud (Qalanjo)
Hiiraan Online