Mar kalaan ku celinayaa “sooma daahin ee dhowr maalmood ka hor dhamaadki shirka Mbagathi ayaan waxaan qoray, maqaal aan ugu magac daray “Shanta Sano Ee Mbagaathi Soo Wado Waa Guul Darro Hor  Leh” iyo maqaalo fara badan oo aan si aad ah uga hadlay xaqiiqada uu shirkaas ku sugnaay , waxaana ka mid ahaa “Shirka Mbaghati Waa dhagar Abaabulan Ee Dhulka Soomaaliyeed Ma Jirtaa Meel Naga Dhexeyso”

Xamaasad uma haayo, laakin waa lama huraan in aan ka hadlo madaxweynaha qaflada lagu doortay, dowladda uu doonayo in uu soo magacaabo iyo xabashi ma ka runbaa, heshiiska ay Cabdullahi wada galeen in ay  fulinayso, iyadana danaheeda halkaa ka dhex doonayso ,misa isagana waa Soomaliye, waxba kama duwano ummada uu ku abtirsado oo ay mudda dheer dabin u qoolaysay.

War iyo dhamaantiis isku soo duub ,hadal tiridiisana ku soo koob, Milis Sanaawe waa tashanayaa, Cabdullahina waa tashanayaa, Ilaaheyna waa tashanayaa, Soomalina way jiiftaa, annaga oo aan kala soocin,hogaamiyayaasha Banaadir, qaarna weli naxdinti kama soo kicin, qaarna waxaa raja kaga jirtaa hogaaminta dowlad madaxweynaheeda keligiis dowlad yahay.

Cabdullahi Yusuf mudda dheer ayuu dadaal ugu jiray in loogu yeero Madaxweynaha Soomaaliyeed, waana loogu yeeray maanta, oo xaqiiqo ayey noqotay taa iyo in ay dhegahiisa maalin walba ku dhacayso jaalle Madaxweyne.

Cabdullahi ma riyoon isaga oo soo jeedo iyo isaga oo hurdaayo toona, oo waa ka soo shaqeeyay dhacdadan, waddadi uu doono ha u maree, waxaana khudbadiisa maalinti loo dhaarinayay madaxweyninimada ka mid ahaa “dadka soomalida isku dhaqan maaha, waayo qaar habeenki ayey shaqeeyaan, qaarna maalinti ayey shaqeeyaan,anigana waxaan  diyaar u ahay in aan labadaba la shaqeeyo”.

Hadalkan wuxuu ka tarjumayaa in uu cabdullahi diyaar u yahay in uu galo khiyaana waddan, kol haddii uu raali ka yahay, la shaqaynta nin san iyo nin xun oo habeenki wax xado.

Cabdullahi qudbadiisa guud ahaan, kuma jirin hadal si lama filaan ah afkiisa uga soo yeeray, xitaa uu ku noqnoqday ciidama shisheeyo ee dadka Soomalida hubka ka dhigo, dalka ha la keeno, isaga oo aan taa kala tashan barlamaanki soo doortay iyo dowlada la filayo in uu soo magcaabo iyo  wasiirka koowaad ee  uu u garto in uu howsha dib-u-duminta Soomaliyeed la wado.

Cabdullahi wuxuu ku tashanayo isu tilmaamimeyno, waana nin ay u jeexantahay waddadi uu u mari lahaa, gaarista isaga oo caasumada Soomaliya ka deggan, guri uunan marti ku ahayn, laakin waxaa su’aal ka taagan tahay isaga ma isweydiiyay, xabshida uu ka filanayo in ay garbaduub ugu qabato Xamar in ay doonayso dowlad xoogan ee Cabdullahi hogaamiyo iyo in kale.

Cabdullahi siduu isgaba sheegay wuxuu ku tashanayaa hadal laga haayo afkiisa “waxaa iga go’an saddex arrimood midkood in aan la imaado”. saddexda, tan u danbayso, ma filaayo in ay maanta jirto Soomaali rumaysanayso.

1) In aan dalkeena ku soo dabaalo nabad lagu wada noolaado iyo kala danbayn.

2) In aan ku dhinto raadinta tan koowaad.

3) Iyo in aan iska keeno madaxnimada barlamaanka hortiisa ,isna casilo, haddii aan ku fashilmo gaarista tan koowad.

Mlis Sanaawe wuxuu ku tashanayaa ,saddex shay oo uu mudda dheer ku taamayay, oo uu maantana u helay ninki ku haboona fulinteeda.

1) In ay Soomaali mar kale heyb isu disho,dagaal lagu hoobtana uu ka dhax qarxo, ilaahey taa ma aqbalee, adduunkana uu u sheego war waxa kan dowladnimo ma garanayaan.

2) In uu gacanta ku dhigo gobalka jubbadda hoose iyo gobalka Bay isaga oo taa u marayo, gacan siinta dowladda uu horboodayo nin ay madax martay, mar uun ha laguugu yeero, madaxweyne.

3) Ku negashaada goballadaas, isaga oo haddana taa u marayo dadka reer koofureed oo uu hubeeyo, kuna yiraa iska dhiciya cadowgiina shalay, idin dul degganaa, si ay u dheeraato joogida Xabashida ee dhulkaas.

Ilaaheyna waa tashanayaa ,waxaana ilaahey ka bayaynaa in uu umadda soomaliyeed ka yeelo kuwi ka gacan sareeyo cadowgooda, howshana kala wareego dhamaan inta suurta gelisay in Cabdullahi Yusuf loogu yeero jaalle Madaxweyne si dadban iyo si toos ahba.

  Intaa oo hordhac ah keddib, waxaan Cabdullahi u sheegaynaa in uu ka waantooba in uu lugaha la sii galo, taariikh ka sii madow, tiisi hore iyo baalal hor leh oo dhiig lagu qoro.

 Kooxaha muqdishana waxaan u sheegaynaa in ay xilalka ay sheegtaan ku wareejiyaan dad xilkas ah, oo yaqaano waxa ay rabaan, danta soomaliyeed halka ay ku jirto guud ahaan iyo cadowga oo la iska mooso inta uunan lugaha kula soo galin.

 Soomalina guud ahaan waxaan kula talinaynaa in aan Cabdullahi Yusuf  loo sameyn cudurdaar, taas oo aan uga jeedo, ha loo kaadiyo odayga, yaan laga waalin, ilayn ruuxa kolka uunan wanaag wadin, meel ma gaaro, haddii uunan u helin ruux ka hor yimaado oo u dhaqmo sidiisa. Cabdullahi Yusuf oo laga horyimaado, ha ku ekaato sharciga oo la adeegsado iyo dastuurka ay xabashida naf’ahaanteeda soo diyaarisay, haddii uu gacan ka hadal layimaadana ,taa waa tala faraha ka baxday iyo iska dhicin lagu sii tashtay.

 Sidaan horayba u sheegay, in Shirka Mbagathi soo wado Shan sano oo murugo leh, haddana waxaan idiin sheegayaa,sadaalna ah.gaar ahaan,  arrimaha marka dhinaca san laga fiirsho, Cabdullahi la imaanmaayo guul Soomaliweyn u soo hoyato, guul darrada Cabdullahi la yimaadan waa guusha Soomaliyeed, guuldaradiisana waxaa laga dhaxlayaa arrimaha hoos ku xusan.

1 ) In hogaamiyayaasha reer Muqdisho oo waddanka meel u dhigi waayay ay ku qaadon doonaan darsa siyaasadeed, guul darradi ay kala soo hoydeen riwaayadi Mbagaathi oo ay daawadayaal ka ahaayeen, Cabdullahi yusufna kaga adkaaday, halka ay iyaga u haysteen in riwaayadaas ahayd jidki ay u mari lahaayeen, danaha shaqsigaa oo ay ummadda kaga hor istaageen in ay aayaheeda kaga tashato.

2) In taageerayaasha  Cabdullahi Yusuf  garwaaqsan doonaan, khiyaana lagu doono dowladnimada waddanka in ay tahay guuldarro aanan laga soo kabanayn iyo in Soomaali oo la doonaa  ay tahay guul Soomaali oo dhan u soo hoyatay.

3) In dadka deggan caasumaada geed ku xiraan cuqdo qabiil iyo qab aan loo meel dayin, una soo jeestaan waddanki Soomaaliyeed oo dib loo dhiso, loona sinaado awoodiisa maamul in aynan guul ka sukayn.

4) In soomalida inteeda isku tiriso, tiradooda oo yar, ogalaadaan in toosnaan loo wada socdo, in ay tahay guul la wada gaaray oo loo dhan yahay. 25/10/2004

Abdallah Moallim Mahamud

Moallem10@hotmail.com