Muqdisho, Sabti, 27-Nov-04

War-Saxaafadeed ay maanta soo saareen 21-xubnood oo ka mid ah Aqoonyahannadda, Odayaasha Dhaqanka, Siyaasiyiinta iyo Culuma’udiinka Beesha Hilibi Dalandoole ka soo saareen Magaalladda Muqdisho, ayaa waxay ugu baaqeen Ra’isul-wasaaraha Dowladda Federalka ee Dalka Somalia, Prof. Cali Maxamed Geeddi inuu keeno xal-siyaasadeed oo ay caddaalad ku jirto, isla markaana uu saxo qaladaadka ku jira xubinta Beesha, waa sida uu hadalka ugu dhignaa War-Saxaafadeedka.

Nuqul ka mid ah War-Saxaafadeedka, oo la soo gaarsiiyey Xafiiska Website-kan, ayaa lagu muujiyey inay Beesha Hilibi Dalandoole xubintooda siyaasadeed uu wakiil uga yahay Wakiilka Siyaasadda ee Beesha, Dr. Nuur Xaydar Maxaad, oo haatan ku sugan Deegaanka Embagathi ee Magaalladda Nairobi ee Dalka Kenya.

War-Saxaafadeedkan, oo uu ku saxiixnaa Aqoonyahan C/qaadir Xuseen Walaal, ayaa waxa uu soo baxay dhowr maalmood kadib, markii ay Xildhibaanadda Beesha Mudulood raalligelin u jeediyeen Siyaasiyiinta iyo Odayaasha Dhaqanka ee Beelaha Hilibi Dalandoole iyo Mobleen Cismaan, oo iyagu aan xubno laga siinin xubnihii ku soo aaday Beelaha Mudulood.

Beesha Hilibi Dalandool, waxay waalid ahaan ugu aadan yihiin Beesha Abgaal Cismaan, halka Beesha Mobleen Cismaan-na ay walaalo yihiin Beesha Abgaal Cismaan.

__________________________________