March 13, 2005

 Waa la heshiiyay waa hadal weyn oo leh xaqa ah in lagu taamo kol haddii ummad iskhilaafsan ku dhawaaqday waa la heshiiyay.

  Waa la heshiiyay ma'ahan marki u horeysay oo ummadda Soomaliyeed loo meeriyo ,lagana dhawaajiyo iyada oo loo taagan yahay heshiis horay u dhaxmaray kooxaha isku haayo maareynta arrimaha ummadda Soomaliyeed, sida in weli lagu taagan yahay taabagelinta heshiis laga gaaray dhismo dowladeed oo dimoqaraadi ah, waa sida ay u dhigeen kooxaha labada sana u fadhiyay magaalada Nayroobi iyo dowladaha ku bahoobay Igad in Soomaali weyn heshiisay kuna dhaqaaqday fulinta heshiisyadi ka soo baxay shirkoodaas.

  Waa Su'aal ku aadan kooxaha isku sheegay in ay maanta magaalada Nayroobi ku qabteen xaflad balaaran oo lagu maamusayo heshiis laga gaaray in Caasumada Waddanka Soomaliya Muqdisho loo sameeyo maamul. Su'aasha waxay tahay idinka ma ka baxdeen heshiiski Nayroobi ,haddii aadan ka bixinana, maxaa diiday dowladi aad ku heshiiseen madaxdeedi in aynan goobjoog ku ahayn goobta aad heshiiska ku gaarteen iyo xaflada aad ku sheegteen in aad ku maamusaysaan heshiikaas.

  Waa su'aal kale ,hashiiska aad gaarteen idinka oo Nayroobi joogo ma ku soo qaadateen daawaynti nabrihi aad u gaysateen Soomaliweyn guud ahaan iyo gaar ahaan Caasumadda Soomaaliya dadweynihi ku soo haray kolki aad soomali kala raacdeen ,haba ugu darnaadee dagaalki afarta bilood ku dhexmaray kooxihi isku qabtay hogaaminta waddanka Soomaaliyeed guud ahaan iyo gaar ahaan maareynta howlaha maamul ee gobalka Banaadir.

Waa su'aal kale, ma isweydiiseen oo ma isku soo qaadeen inta aadan ka tashanina maamul u sameynta gobalka Banaadir  in ay xamar cadde ka jiraan kooxo aan idinka hub yareyn oo isugu jiro kooxo wax haleyn iyo dhibaataynta shacbiweynaha Soomaliyeed guud ahaan iyo dadweynaha gobalka banaadir gaar ahaan aan idinka yareysan,islamarkaasna aan idinka yareysan dhihitaanka caadadiini ahayd diidnay wax walba oo ku salaysan nidaam iyo kala danbayn loo helo waddankan ama gobal ka mid ah, iyo kooxo kale oo hubkooda u haysto sidi ay u ilaashan lahaayeen danahooda tujaaro ,naftooda iyo jiritaankooda iyaga oo aanan ku tiirsanaan u baahnaashada damiirlaawayaal la haray waddanki oo dhan.

  Waa su'aal kale ma isweydiiseen in ay raali ka yihiin iyo in kale hashiiskan aad sheegteen in aad isla meel dhigteen madaxda mushaarka idinku siiso goobaha aad ka talisaan dadweynaha ku nool in aad u soo jaajustaan qaabka ay u fikiraan ama guud ahaan fikirka ay ka qabaan waxa loogu yeero la dagaalanka irhaabka caalamiga ah.

Su'aaladahan oo dhan iyo kuwa kale marki aad doonto in aad ka jawaabta waxaa kuu soo baxayo kooxaha hubaysan ee xooga ku haysto magaalada Muqdisho iyo waddanka intiisa kale in aynan weli diyaar u ahayn xal loo helo sida waddanka Soomaliya ugu tilaabsan lahaa xaalad nabadgelyo  iyo kal danbayn lagu wada noolaado.

  Ma ogtihiin waa la heshiiyay marki laga maqlo raggiina Nayroobi ku wada saxiixay hashiiska 30ka qodob ka kooban in ay ummadda Soomaaliyeed intooda xalaal quudata ah markiiba qoddobadaas u aqrisanayaan, dibandaabyo hor leh oo lala doonayo waddanka Soomaliya.

 Meel nama geyso waa la heshiiyay looga cararayo saaxib aad ka siman tihiin daadinta dhiiga ummadda Soomaliyeed.

    Heshiiskiinaan iyo guusha Cabdullahi Yusuf ka soo hooyay doorashadi tartanka loogu galay madaxnimada Soomaliyeed wuxuu na baray marki laga hadlayo arrimaha siyaasada Soomaliya in aad weli ku jirtaan xaalad garguurad barasho, halka uu Cabdullahi Yusuf oo hogaaminayo dowlad fadhiid ah, xubnana ka yihiin idinka oo kale muujiyay karti iyo firfircooni dheeraad ah oo abuurtay in aad xabadka isku qaadaan mar kasta oo uu muujiyaba ficil nidaam xambaarsan oo uu ku doonayo in uu ku galo magaalada Muqdisho, sidaana gacantiina uga baxsho ,xabashiba ha u kaashtaa, ilayn waa sidiina marka laga fiirsho daadinta dhiiga Soomaliyeed ,wallow oo idinkaga duwan yahay in uu iskala weyn yahay la gorgortanka asxaab la hartay dadka ay ku doodayaan in ay ku maqan yihiin danahooda..

    Waxaa xaqiiqa ah in uunan Cabdullahi Yusuf habeen kaliye ku hoyan Karin magaalada Muqdisho isaga oo doonayo in uu ku jooga mooryaanimadiina oo kale kolki arrimaha Soomalida laga fiirsho halka qabiil ku tiirsanaashada naga gaarsiisan-tahay.

  Hashiiskiina waa waxaan doonaynaa in aan lisno hashi Muqdisho iyada oo uunan gacantiina ku jirin ganuunki lagu lisi lahaa caanaha hashaa aad doonaysaan in aad listaan.

    War wiilal yahow isla haray ,ummadana la haray aan idiin sheegno qaabka kaliye ee maamul loogu sameyn karo magaalada Muqdisho gaar ahaan iyo waddanka Soomaaliya guud ahaan in ay tahay iyada oo la wada  hadlo,lana wada gorfeeyo arrimaha Soomaalida,meelna wax la isla dhigo,iyada oo la wada joogo gogol kaliye ,ruux Soomaliyana aanan laga maarmin ,lana yasin,qabiilna aan lagu riixin ,xoog maleeshiyana aanan lagu tixgelin.

   War hooy ummadda waa idin baratay ,waana ognahay in uu cadowgiina yahay nidaam iyo kala danbayn,war aan idinku wargelina ma jirto taariikh madow oo iska socoto Sida ay taariikhda na bartay,ma jirto xoola dad kale leeyahay ayaan heshiis ku gaarnay sii haysashooda, dadki lahaana waa noo sacaba tumeen, ma jirto dowlad la'aan iska soconayso,dowladna dowlad ma noqoto nidaam la'aan iyo kala danbayn la'aan.

War ka kaalaya jahliga siyaasadeed oo aad ku jirtaan ,arrimahana u daaya dad idinkaga xog roon inta aan cadowga na wada qabsan.

    Waa la heshiiyay qaawan waa ceeb iyo lama arag ,dibadi waa la idinkaga badiyay, gudihina siyaasad iyo xoogba in aad ku maquunisaan waa ku fashilantaan ,war hoy ka kaalaya bohosha aad ku jirtaan ee iftiinka u soo baxa, Soomalidana dhinac ka raaca inti wada hadalka furan yahay ,jabkiinana uunan noqon domino la daadashay oo kale.

Ganuun La'aan Aan Hasha lisno Waa hal bacaad lagu lisay

Abdallah Moallim Mahamud

Moallem10@hotmail.com

  _