C/qaadir sanka ayey dadka reer Muqdisho ku tilmaameen xilligan heesaaga loogu jecel yahay xafladaha, aroosyada iyo bandhig faneedyada lagu qabto Hotelada waaweyn ee Muqdisho, wuxuuna C/qaadir sanka uu sheegay in qiimeyntaasi uu ka kasbaday shacabka ay tahay mid uu ku xajistay mihnadiisa fanla oo uusan ku dheelin isaga oo xusay in uu mar kasta qiimeeyo kooxdiisii fanka ee Iftin walina mgacaasi uu ku daadihiyo dhinaca fanka wuxuuna sheegay fannaanka Muqtaar Ramadaan Iidi oo degan degmada Waaberi soona maray kooxdii Durdur ee xilligaan ay iskala tirsan yihiin kooxda fanka ee Iftin.

C/qaadir sanka oo ku luqeeya heeso dabacsan oo fara badan iyo kuwo wadani ah ayaa ahaa mid ka mid ah heesaayaashii ugu cad cadaa kooxdii Iftin waxaana garbihiisa buuxin jiray heesaayaashii ay ka midka ahaayeen Bashiir Cali Xuseen, Khaliif Cismaan Cabdi (Sayid khaliifa), Maryan Cali Muudeey, Max’ed Cabdi Sh. Carab, Farxiyo Cali Sheekh, Caddey Cali Axmed iyo Luul Cabdi Sheekh oo hadda ka joogta heesaayaashaasi kooxdii Iftin ee ay C/qaadir sanka isla soo qaateen waayihii Iftin xilligii bariisamaadkii.

C/qaadir sanka riwaayadaha uu ka qeybgalay waa kuwo aad u fara badan oo aan lagu soo koobi karin waxaase laga xusi karaa Amakaag jaceyl, labo dhaqan kala dheer iyo kuwo kale.

“Caddey Cali Axmed, Farxiyo Cali Sheekh iyo Luul Cabdi Sheekh ayaa ka mid ahaa gabdhihii Iftin ee heesaha dabacsan aan wada darandoorin jirnay” ayuu yiri C/qaadir Sheekh Cali Sanka oo ku tilmaamay gabdhahaasi kuwo cod macaanaa oo soo maray kooxdii Iftin.

Fannaanku shirkii Carta ee la qabtay sanadkii 2000 wuxuu ka mid ahaa heesaayaashii ugu caansanaa ee isugu tegay halkaasi isaga oo heestii caan baxday ee magaceedu ahaa “Safar baa la tegayaa” ka qaaday shirweynihii Carta ee ka dhacay dalka Jabuuti iyo heeso kale oo uu la qaadayey fannaaniintii ka qeyb gashay shirkaasi.

Waxaa diyaariyay: Axmed Max’ed Cabdulle (Uur Doox).

Dayniile.com

23 - 01 - 2005 - Tacsi

C/qaadir Sheekh Cali (Sanka ) oo Xalay ku geeriyooday
Magaalada Muqdisho

Allaha u Naxariistee Waxaa xalay Magaalada Muqdisho ku geeriyooday Fannaanka caanka ah ee ka tirsanaan jiray kooxdii Iftiin ee wasaaraddii Waxbarashada iyo Barbaarinta xilligii hore C/qaadir Sheekh Cali (Sanka) kadib markii sida la sheegay wadnaha Istaageen xilligii dambe ee xalay.

Dhamaan bahda Midnimo meel kasta ay joogaan waxay tacsi u dirayaa Eheladii, Qarabadii iyo Caruurtii uu ka tagay maraxuumka, waxay kaloo tacsi u dirayaa dhamaan Ummada Soomaliyeed gaar ahaan inta fanka xiiseyso waxaanu leenahay samir iyo IImaan Illaah ha naga siiyo marxuumkana Janadii fardowsa Illaah ha ka waraabiyo Aamiin Aamiin Aamiin........

Marxuum C/qaadir Sanka ayaa waxaa uu ka mid ahaa dadkii ka qeyb qaatay shirkii dib u heshiisinta soomaaliyeed ee lagu qabtay 2000 Magaalada Carte ee dalka Jabuuti, isagoo uga qeyb qaatay dhanka Fanka sida heestii :Safar baa la tagaya iyo socodka dheero soo noqod lahayno ina wada sugaaye”

C/qaadir Sanka waxaa uu ka mid ahaa fanaaniinta 14 sano marqaatida ka ahaa waxyaabaha ka dhacayay dalka, marka laga reebo socdaalo uu ku tagay dalka Sacuudiga iyo Jabuuti, waxaa uu Ifka ugu tagay hal Xaas iyo 2 Carruur.

Sanka waxaa uu ka mid ahaa dadka magic ku leh guud ahaan soomaaliya gaar ahaan magaalada tan muqdisho, waxaa uu ka deganaa Xaafadda Kaaraan, halkaas oo uu kula noolaa hooyadiisa iyo xaaskiisa.

Inta badan aroosyada laga dhigo magaalada muqdisho ayaa heesaha laga qaadayo waxaa horumuud u ahaa Fanka, waxaa uu magaalada muqdisho ku lahaa dad badan oo isaga taageersan.

Wararkii ugu dambeeyay dhanka geerada Fanaanka ayaa sheegaya in maanta lagu aasi doona deegaanka Afgooye, iyadoo dad badan maanta hor dhoobanaayeen gurigiisa ee muqdisho.

Nuuradin Macalin Mukhtaar (Dinow) nuradin007@hotmail.com
Midnimo Information Center

_______________

 _______________

_______________

_______________