Quraafaadka Faaliyuhu Ma’ahan Qowl Ilaah

Qeybtii koowaad

Email: Moallem10@hotmail.com

__________________________________________________________________

Ma fara yara dhibaatooyinki ay geysatay Abaartii dabadheer 1973/1974 ka dhacday Goballa  badan oo ka tirsan  dalka Soomaaliya. Waxaa dhacday roob la’aan waxaa aad u yaraaday biyihii, dhulkii waa xaalufay, qoraxdana aad bay u kululaatay, sidaa darteed waxaa dilaacay abaar ay ku dhamaadeen dad iyo xoolo aad u fara badan, caruur badan ayaa abaartaa ku Hooyo, Aabe iyo Ehel waayay. Gabar yar oo da'adeedu ahayd saddex iyo toban jir lana yiraahdo Maryan ayaa ka mid ahayd caruurti abaartaa ku tabaalowday.

Maryan Ilaah baa ka badbaadiyay abaartaas aad ayeyna u itaal darneyd, waxayna ka soo hartay qoys dhan, iyadana ma sugayn in ay ka samata baxdo maxaa yeelay dadki ay cawinaad ka heli lahayd waxa ugu nolol danbeeyay walaalkeed oo ahaa curadki reerkooda aadna u jeclaa Maryan, dhabarka ayuu ku qaaday, nafaqadi ay helaana iyada ayuu siinayay ilaa uu isagii baahi u dhintay, waxayna markaas marayeen iyagoo naf la carar ah dhul baadiyeedka kofur ka xiga Magaalada Galkacyo. Maryan aad bay uga sii nixisay geeridi ku timid walaalkeed, iyada oo niyada iskala hadleyso ayeyna tiri "waxa isugayo waa uun dhimasho".

Maryan waxaay u dhaqaaqday iyada oo garguuraneyso jihadi uu u socday walaalkeed marki ay saakay fadhiisanayeen geedki uu ku nafwaayay iyada iyo walaalkeed intuuna naf weyn ka hor, ma aynan  garaneyn in ay wadada laamigaa u jirto masaafa gaaban geedki ay fadhiisteen saakay, dantana uma ogalaan walaalkeed in uu soo gaaro laamiga tabaryaro awgeed, nasiib wanaagse Maryan waxaay soo gaartay meel laamiga u jirto boqol iyo khonton meter, dhulka wadada laamiga ka xigana wuxuu ahaa banaan ay yaaliin dhagax yaruuraca, waxaa kale oo bankaa ku tiil dudun aan saa u sii weyneyn, waqtiga wuxuu ahaa shanti iyo afartan  daqiiqo, qoraxdana waxaay ku sii socotay godkeedi caadiga ahaa oo ay u hoya jirtay. 

Maryan markaay nasatay toban daqiiqo waxaay dib u bilowday in ay dhaqaaqdo keli ahaanteed, sii gargaguuratana inti nafta gaarsiineyso laakin ma'aynan noqon suurtagal in ay garguurato in ka badan shan iyo soddon meter, wayna tabar dhigtay oo dhaqaaqii wey gebtay.

Waxaana dhanka koofureed ee laamiga ku yimid gaari marsheedis ah oo siday biyo lagana soo diray Magaalada Muqdisho wuxuuna u socday in uu u gurmado dadka abaarta ku heshay baadiyaha magaalada Gaalkacyo iyo agagaarkeeda, waxaana gaariga waday darawal u shaqeeyo dowladda, waxaana la socday wiil iyo gabar iyagana ku socday gurmadka u gargaarida dadka iyo xoolaha abaarta halkaa ku haleeshay. Wiilka waxaa la yiraa Axmed, gabadhana Sahro waxaayna ka socdeen laanqeerta cas waxayna qabeen tababar gaaban oo caafimaadka degdega ah waxaana loogu tala galay in ay ka howl galaan meelaha abaarta ku habsatay sida ugu dhaqsiyaha badan.

Meel ka xigto galbeedka halki maryan ku tabar beeshay marki ay marayeen ayaa Sahro weydiisatay shufeerki in uu gaariga joojiyo, shufeerkiina isaga oo Sahro la kaftamayo ayuu yiri."Sahro maa inoo sheegtid waxa aad u dalbatay in aan gaariga joojiyo”
Sahra oo qosleyso ayaa ugu jawaabtay "hadal waqti uma haayo ee gaariga jooji".  Shufeerkii gaariga waa joojiyay wuxuuna yiri "warkaaga jiro" Axmed ayaana markaas raaciyay "Sahro waad ku mahadsantahay in aad weydiisato joojinta gaariga "

Sahro way degatay, Axmedna wuu ka soo daba degay wuxuuna aaday jihadi sahra aaday maahine jihada kale. Sahro iyada oo gaabineyso ayey socdokeedi sii heysay inta ay isheeda ka qabaneyso meel ay kula ganbato darab sagiirki ku qasbay in ay weydiisato joojinta gaariga, waxayna gacanteeda bidix ku sidatay caag godan oo ay gaariga kala soo degtay uguna jireen biyo, horteeda ayey markiiba uga muuqatay buur yar oo cas dulduleelana  leh iyada oo cabsaneyso ayeyna niyada ka tiri "maxaad ka cabsaneysaa laba ninbaaba kula socdee haddii aad qeylisana codkaaga waa la maqlayaa" waxaayna abaartay buurtii, kalana wareegtay dhanka bidix. 

Keddib marki ay darab qaadatay Sahro way istaagtay waxaayna u dhaqaaqday xagga dudunta oo horteeda ku beegneyd iyada oo dooneysay in ay ku dul istaagto, indhahana la raacdo dhulkan banaan ee dhan walbo oo ay u jaleecdo ka qabanayo, Sahra waxaay dul istaagtay buurta dusheeda waxaana u muuqday Axmed oo ka soo laabtay darabqaadkii iyo shufeerki oo inta soo degay gaariga hoos taagan waxayna u lalinayeen gacmahooda iyaga oo siinayo tilmaan ah war naga kaalay, Sahrana iyada oo aan ka jawaabin baaqaa ayey u jeesatay dhanka qorax ka soo baxa waxaana markiiba isheeda ku dhacay wax madow oo muuqaal beini'aadam u eg waxaana gashay cabsi oo cod dheer ayey ku wacday Axmed iyo shufeerki, iyagana marki ay maqleen codki ay sameysay Sahro waxaay u soo caraareen dhankeeda, markeey soo gaareen dudunti ay sahro ku taagneyd ayey mar qura isla yiraahdeen maxaa ku helay misa nabad qabtaa haddeer.. 

Sahra ayaa  tiri  walaalayaal waan nabad qabaa waxbana ima helin ee waxaan rabay in aad ila hubisaan shaygaas muuqaalka beni'aadam leh oo keliya ee kaalaya aan hubinee, waxayna u dhaqaaqeen mar keliya hubinta tuhmadi ku jirtay waxaana indhohooda ku dhacay Maryan oo indhaha kala heyso himana u yeelatay nolol danbe marki ay u jeeday dadkaa dul taagan  laakin wax hadal ah afkeeda kama soo bixin itaaldarro awgeed, shufeerki ayaa markiiba fadhiistay meel madaxa kaga aadan wuxuuna kor u qaaday madaxeeda isaga oo leh "waa tii u danbeysay ee Axmadow dhexda iyo lugaha qabo oo aan la gaarno gaariga si aan dhaqsi u geyno dhaqtarka", Axmedna wuxuu gabadha ka fadhiistay dhanka bidix wuxuuna Sahra u dirsaday biyo isaga oo darawalki ku leh bal u gaadi aan isku dayno in aan biyo iyo baad siino haddii ay qaadan karto inti uu hadalka hayayna waxaay Sahro la soo gaartay biyihi, Axmad isagana wuxuu madaxa ka soo qabtay Maryan isla markiina biya aan sidaa u badnayn ayuu afka ugu qabtay keddibna Marki ay biyiha in yar ka kabootay waxaay u qaadeen Xagga gaariga si dhaqsiya iyago oo doonayo in ay la gaaraan magalada Gaalkacyo oo ahayd jihadi ay ku socdeen .

Kolki gaariga dhaqaaqay wax hadalla ma jirin darawalki, Axmed iyo sahro  waxayna ka bixi waayeen oo niyadooda mashquulisay howsha sugeyso in aynan ahayn mid fudud oo uu ka bixi karo ruux naftiisa jecel oo kaliya oo aanan ogalayn in naf kale wanaag iyo nolol wacan haysato, balsa darawalka taa waa kaga duwanaa iyaga oo isaga ma saarnayn culays aan ahayn in uu si dhaqsiya u socdo si ay u gaaraan Magaalada Gaalkacyo ilayn isaga kuma cusbeyn abaar lala tabaaloobo oo dad iyo xoolaba baab'iso, waxaasa isaga ku taagnaa dhaqsi u soco, welwel, fikir iyo goormaad magaaladi gelysiin.

Wadahi isaga oo aan wax ka beddlin sidi degdega ahayd oo uu gaariga u waday ayuu dhanka koofureed ka soo galay magaalada Gaalkacyo halka laga raaco gawaarida u kala gooshto masgaalooyinka ka fog iyo kuwa u dhowba magaalada, waxaa kale oo boosteejada ku yaal maqaayado laga shaaho lagana cunteeyo isla markaasna ay ku nastaan dadka safarka ah, waqtiga wuxuu ahaa fiid hore waxaana maqaayadaha fadhiyay dad aad u badan sidaa darteed wadihi  wuxuu gaabiyay gaariga socodkiisa si uu uga fogaado dhibaato kaga timaado dadka oo ku soo xayraamo gaariga magaalada

ku soo galay socod aad u dheer awgeed, darawalki ma joojin socodkiisi in uu gaabiya wadida gaariga maaine wuxuuna marki u horeysay joogsaday bartamaha magaalada, rugta Saraakiisha Ciidamada Xooga Dalka Soomaaliyeed horteeda.waxayna habeenkaa darawalka. Axmed iyo sahara u ahayd marki ugu horeysay oo ay yimaadaan magaalada Gaalkacyo, joogsi keddib Darawalki oo doonayo in uu u yeero mid  ka mid ah dad hortaagnaa derbi gaaban oo ku dherersan xarunta Ciidadmada Xooga Dalka Soomaaliyeed ee magaalad Galkacyo horteeda ayaa Axmed (oo isaga ahaa jooga maqan tan iyo inti ay soo qaadeen Maryan kuna maqnaa ka ducaysiga ilaaheey in uu ummadda Soomaaliyeed ka qaado muragada dhibaatooyinka ay dabada ku wadatay abaartii dabadheer loogu magacdaray) ku yiri "war u yeer sarkaalkaa labisan dareeska milateriga".

Shufeerki marki uu arkay sarkaalka Axmed u tilmaamay ayuu gaariga u qabtay shakaalka gacanta una soo degay dhulka wuxuuna u yeeray sarkaalki oo ku sii socdo gaari uu'aasa ah, kuna baarkin garaysnaa meel ku aadan gaarigi ay wateen hortiisa dhanka bidix ee wadada, sarkaalkiina waa maqlay codkaas u yeeray kuna leh "dhame, dhame"wuxuuna u soo jeestay halki laga wacay isaga oo leh "kuma ayaa ii yeeray"

darawalki ayaa ku yiri "walaal waxaad noo sheegtaa dhaqtarka magaalada xaggee ku yaalaa "

dhamihi oo aan ku daahin jawaabta ayaa ku yiri "dhaqtarka wuxuu ku yaalaa xoogaa yar marki aad horay ugu socotaan waddadan, waxaana dhanka bidix kaa qabanayo jardiino ay ku yaaliin geedo waaweeyn, dhinaceeda bidixna waxaa ku yaalo dhaqtarka ugu weyn magaalada Gaalkacyo, iridkiisana wuxuu ku jeedaa dhanka qorax ka soo baxa haddii aad ku wareertaana waxaa idin shaki bixinayo oo woqooyi ka xigo dhaqtar weyn oo khaasa u ah daaweynta cudurka qaaxada" darawalki ayaa ku yiri waa mahadsantahay walaal una dhaqaaqay dhanka albaabka gaarikiisa laakin sarkaalki ayaa ku soo celiyay sua'aal inta uunan dhaqaaqin wuxuuna kui yiri  "maxaa idin helay oo aad dhaqtarka ii weydiiseen".

Darawalki ayaa si deganaan ku jirto u yiri "waxaan meel wadada Gaalkacyo soo gasho dhineceeda ah ka soo qaadnay gabar yar oo aad u tabaaleysan meel ay ka timidna aanan garanayn, waana taa Ahmed iyo Sdahro la saaran gaariga shirkiisa"

Isla markiiba sarkaalki ayaa yiri I soo daba kaca aniga ayaa idin geynayo dhaqtarka wuxuuna aaday gaarigiisa oo uu durbadiiba u dhaqaajiyay hortooda oo dhaqtarka magaalada ku aadanaa si aan waqtiga kale uga dhumin dadkan gacanta weyn ka geystay daryeelka ummadda Soomaaliyeed,darawalkiina waa daba galay isaga oo Sahro iyo Axmed ku leh "bal ka warama dadka oo dhan haddii ay sidaa u wanaagsanaan lahaayeen".

Axmed ayaa darawalki ku yiri lagama yaabo dadka in ay sidaa u wada wanaagsanaadaan, meel walbana waxaad ugu tageysaa dad kala dabeecad duwan oo leh mid san iyo mid xun, waana ilaaheey mahadiisa in uu annaga  nagu soo hormaro ruux wanaagsan sidi sarkaalkan noo wado  dhaqtarka, Sahro oo iyada la dhacday hadalka Axmad ayaa tiri "tolow maxaan kala kulmi doonaa dadka magaaladan samaan iyo xummaan" waxaana si diiran oo ixtiraam ku jiro ugu jawaabay Axmed oo ku yiri "Sahro dadka ma wada sina ee ilaaheey dadka ha nooga dhigo kuwi aan wanaag badan kala kulano ,annagana ilaaheey ha naga yeelo kuwi howshooda si fiican u guto"

Darawalki oo ilaashanayay uu'aasti uu daba joogay ayaa yiri "Axmad ducadaada alla ha noo aqbalo" wuxuuna joojiyay gaariga keddib marki uu joogsaday sarkaalki horkacayay oo isaga markiiba ka soo degay gaarigiisa una dhaqaaqay xagga albaabka

Isbitaalka, saacadda waxaay ahayd sideedi iyo barki fiidnimo, in yar keddibna sarkaalki wuxuu si degdeg ah garaacid kula dhaqaaqay albaabka weyn ee isbitaalka laga soo galo oo xirnaa waana waayay cid u jawaabto ee ka furto albaabka,darawalki iyo axmed iyagana waxaay dhulka u soo dejiyeen gabadhi tabaalaysnayd,waxayna iyaga oo gabadhi xanbaarsan albaabka ugu geeyeen sarkaalki oo aan weli hayn ruux u jawaaba, wejigiisana ay ka muuqato caro uu ka carooday shaqaalaha ka hurday howshooda, sarkaalki wuxuu mar kale si xoog badan oo cod dheer wehliyo u garaacay albaabka, weli lama haayo cid u jawaabto, laakin nasiib wanaag inti ay garaacayeen ayaa waxaa soo gaaray gabar kalkaaliyad ka ahayd dhaqtarka oo furihi gurigeeda ku hilmaantay dhaqtarka caawa marki uu u dhamaaday waqtiga shaqadeeda, bixitaankeedina ku degdegsanayd in ay u soo tacsiyeyso hooyo dalsan oo biitoonioyad ka ahayd dhaqtarka, dadka bukaankaa iyo shaqaalahana aad u jeclaayeen oo shalay galabnimadi uu walaalkeed ka mid ahaa dad ku dhintay gaari ku qalibmay wadada u dhexeyso buuloburte iyto Beledweyne.

Sahro iyadana waa soo degtay waxaayna la kulantay kalkaaliyadi oo jamaacadeedi ku leh "walaalayaal sow nabad maaha"? waxaana u jawaabay Sahro oo ku tiri "waa nabad ee abaay war ma u haysaa xageey jiraan shaqaalihi dhaqtarka", kalkaaliyadi ayaa tiri  "maxaa idin helay oo waqtigan idin fadhiisiyay albaabka isbitaalka"

Darawalki oo aad ula yaaban qaab xumada albaabka ku haleeshay ayaa yiri "Walaal waxaa wadnaa gabartan yar oo aan ka so qaadnay wadada magaalada ka xigta koofur iyada oo la taag-daran macluul ilaa haddana ma aragno cid aan la hadalno ee adiga maxaad ahayd oo dhaqtarka ku keenay waqtigan"

Kalkaaliyadi: "adeer aniga waxaan ka mid ahay shaqaalaha isbitaalka waxaana ahay kalkaaliyad ee gabarta mee"

Axmed : "abaay gabarti waa taa derbiga ku santeecsan"

Kaalkaaliyadi wxaay gacanteeda saartay Maryam wadnaheeda oo ay ka soo horeeyeen feeraheeda oo gacanta lagu tirinkaro, taasoo aad uga nixisay iyada oo leh maxaa helay caawa shaqaalihi maxaadse si wacan ugu garaaciweyseen albaabka, axmed ayaana ku yiri maxaan garaacna waaba ku daalnay garaacid iyo qaylo dheer, kaalkaaliyadi ayaa si edeb ku jirto ugu jawaabtay iyada oo haddana astureyso khaladka habeenkaa ka dhacay shaqaalaha isbitaalka kuwoodi shaqada lahaa waxaayna ku tiri walaalayaal wixi dhacayba aniga ayaa hadda idin la joogo.

Sahro: “waa khayr haddii la helay ruux waajibkiisa iyo dheeraad gudanayo ee aan waqtiga ka faa'iideysano “.

Sahro waa soo gabisay hadalki waxaayna doontay sarkaalki oo ku maqnaa garaacida dariishadaha danbe ee dhaqtarka,kalkaaliyadina waxaay ku dhaqaaqday garaacida albaabka isbitaalka oo ay hore ugu daaleen jameecadi Maryan keentay, Axmed iyo shufeerkina yaab bay la aamusnaayeen, waxaana in yar keddib ku soo noqday Sahro iyo sarkaalki oo isaga aad ugu xun fadiixada ay caawa kala kulmeen isbitaalka.

Saarkiilki ayaa waxaa aqoonsaday kalkaaliyadi kuna yiri "war Caasha ma adiga ayaa caawa shaqada lahaa "

Kalkaaliyadi : “Maya, anniga shaqada ma lahayn dhame Cusmaan”.

Sarkaalki: “shan iyo toban daqiiqo ayaan taagneyn halkan ee adiga ma haysaa furihi albaabkan hore ee isbitaalka”.

Caasho: “maya oo haddii aan haayo yaaba intaan isla soo gaari lahaa laakin anniga ayaa keenayo oo waxaana ku laabanayaa gurrigi aan haddeer ka imid oo ah gurriga biitooniyada, iyadaana hayso furo labaad “.

Sarkaalki: “waayahay ee soo dhaqso abaay”.

caasho way dhaqaajisay, dhame Cusmaan isagana wuxuu doonay Dr Cali  wxuuna qoladi gabadha keentay ku yiri, “idinkana halkan innagu suga”.

In yar marki ay sii maqnaayeen caasha oo doontay furihi labaad ee isbitaalka iyo dhame Cusmaan oo Dr Cali ka raadiyay gurigiisa ayaa meel ku aadan jiirada isbitaalka waxaa ka soo baxay wiil dhalinyar ee iska laafyoonaya wuxuuna soo abbaaray albaabka hore ee isbitaalka, marki uu soo gaarayna jeebka ayuu kala soo baxay furo ay dabadiisa ka laadlaado silsila dheer  oo ah macdan keddibna furid ayuu ugu dhaqaaqay albaabka isaga oo aan weydiin qoladan iridka fadhida maxaay doonayaan iskaba daa salaam uu  salaama’e. Sahro,Axmed iyo Shufeerki oo aad u yaaban, hadalna uunan  afkooda ka soo bixin ayaa waxaay soo istaagtay Caasho oo furihi labaad ka soo heshay gurriga hooyo Dalsan waxayna indhaheeda ku dhaceen Faarax oo albaabka furayo .isagana uu shaqada iska lahaa habeenkaa waxayna ku tiri"Faarax caawa oo idil xageed ku jirtaty"

Faarax : “Caasha goormeed gaartay drajada aad ku kormeereysid isbitaalka’.

Caasha: “Faarxa iska daa hadalka aan loo fiirsan, Soomaalidana waxaay tiraa"hadal aan fiirsi loo dhihin iyo caano aan fiiqsi loo cabin feerahaay wax yeelaan",ogowna waxaa naga dhexeeyo waa shaqo oo keliya”.

Caasho iyada oo aan doonayn in uu sii dhee-dheeraado hadalka ayey Waxaay qoladi gabadha keentay ku tiri "soo qaada gabadha, qolkaa u shisheeyana geeya" waxaayna aaday qoklki ay u tilmaantay si ay u hagaajiso haddii uunan goglanayn iyagana  way daba galeen oo qolki ayey ugu geeyeen Maryan, waxaana la seexshay sariirti ay ugu talagashay Caasho.

Caasho waxaay bilowday in ay ka bedesho Maryan dharki ay xirnayd una geliso    dhar cadcad ee bukaanka isbitaalka loogu talagalay, howshaas marki ay ka soo jeesatayna waxaay Faarax oo isaga soo galay qolka ku tiri "walaal xaggeen howl ka bilownaa"

Faarax: “sow ma haboono in aan Dr Cali u yeerno”

Caasha : “Dr Cali waxaa raadshay Dhame cusmaan oo isaga qoladan keenay isbitaalka”.

Inti ay hadalka is dhaafsnayeen Caasho iyo Faarax ayaa waxaa yimid Dr Cali iyo dhame Cusmaan, waxaayna soo galeen qolki la geeyay Maryan.

Dr Cali oo aad uga carysan khaladki ka dhacay waardiyihi isbitaalka oo aan weli la hayn iyo faarax oo isaga shaqada lahaa ayaa yiri "faarax yaad ugu tagtay shaqadaada walaal".

Inti uunan Faarax ka jawaabin su'aashaas ayaa dhame Cusmaan yiri "waa mid iga yaabisay waardiyihi isbitalka iyo ninki shaqada iska lahaa oo caawa yeey uga tageen bukaanka jiifa isbitaalka".

Dr cali oo hadalka Dhame Cusman kululeeyay ayaa yiri "gadaal danbe ayaan xisaabtamui doonaa, iddinkana waad ku mahadsantihiin dadaalkiina iyo sida wacan oo aad yeesheen".

Salaam is wareysi keddib Dr Cali wuxuu dhex galay howshiisa iyo in uu baaro xaalada guud ee Maryan oo aan ahayn jiro balso ahayd macluul ku raagtay wuxuuna Faarax ku yiri "ku sur filibo" isla markasna wuxuu u qoray daawo iyo sidi loo siin lahaa.

Faarax: “waayahay Dr Cali ,filibadana waan ku xiraa daawadana sidaad u tiri ayaan u siinaynaa”.

Caasho : “walaal Faarax fursad ii sii inta aadan filibada ku xirin Maryan waxaan ugu soo qubaynayaa Biiya diiran”.

Faarax: “waayahay abaay”.

Dr Cali : “Caasho waa loo bogay kaalinta wacan oo aad ka qaadaneyso howsha isbitaalka kaaga aadan”.
Caasha gabadhi waa u soo qubeysay,  Faarxana wuxuu korka Maryan ku duray filibo, Dr Cali iyo dhame Cusmaan iyagana inti lagu guda  jiray dadaalka Maryan waxay ku guuleysten in ay isla meel dhigaan hoygi ay caawa ku marti gelin lahaayeen darwalki, Sahro iyo Axmed.

Sahro iyadana marki ay aragtay in uu dhamaaday xilki ka saarnaa Maryan ayey wada tashi ay la tashaday darawalki iyo Axmed keddib ku tiri Dhame Cusmaan iyo Dr Cali waxaan idinka codsnaynaa in aad annaga na fasaxdaan si aan u raadsano meel aan ku nasano caawa.
Dr Cali ayaa si gaaban oo ixtiraam ku jiro u yiri: “ma idin fasaxeyno, annaga ayaana marti Inoo tihiin tan iyo inta aad u amba baxeysiin shaqadiini”.

Darawalki, Axmed iyo Sahro waa aqbaleen Soo dhoweyntaas iyo sida wacan ee loola dhaqmay waxaana si diiran Dr Cali ugu jawaabay Darawalki oo ku yiri walaal waan aqbalnay soo dhoweyntiina waadna ku mahadsantihiin. Dr Cali oo ku farxay warka ka soo yeeray darawalki waday gaarigi lagu keenay Maryan ayaa yiri: “ruuxi dadka wanaajiyo ilaah baa wanaajiyo,dadkana way qadariyaan,hadalkana intaa ha inoogu ekaado”.
 Dhmae Cusmaan ayaa Dr Cali ku yiri. “walaal waa runtaa ee inna keena walaalayaal waa waqti danbe”.

Waxaana loo dhaqaaqay banaanka isbitaalka oo uu yiilay gaariga sarkaalka oo ahaa uu'aas iyo gaarigi Maryan lagu keenay. Dahme Cusmaan iyo Dr Cali oo iyaga mabsuud ka ahaa dadaalka  iyo firfircoonidi ka muuqatay kooxdan Maryan isbitaalka keentay waxay martidi geeyeen guriga Dr Cali. Dhame Cusmaan isagana wuxuu ku laabtay isbitaalka wuxuuna soo qaaday Caasho oo uu keddibna geeyay gurigeeda, wuxuuna uga mahadnaqay sida wacan oo ay ula shaqeysay habeenkaa.

Fiiro Gaar ah/ Weli way socotaa Sheekada waa ilaa Todoba Qeybood

Sheekadan waxaa qoray oo isku soo dubariday Abdallah Moallim Mahamuud (Siyaasi)

Sheekadan waxaad ka dalban kartiin iyadoo Buug ah Qoraaga Buuga:- Abdallah Moallim Mahamuud (Siyaasi) waana qiimo aad u yar oo macquul ah Buugii.

Lacagtana waxaad ku bixin kartiin Xawilaada Towfiiq Sucuudiga ama Xawilaadaha kale ee wadanka ka jiro.